Even òfreken

Leerms haar nog gain jachthoaven. En ook nog gain volkstoentjes. En Freddie ston nog gewoon ien dörpshoes achter tap.
Dij zodderdagoavend ien feberwoarie was eerste toneeloetvoeren van dat seizoen. Ik haar zulf ook weer mitdoan, omreden ik maag geern n beetje teneelspeulen. t Mout lovve zeggen circa-plusminus-ongeveer-pak-hom-beet n uur of drij middenien naacht west hemmen, dat ik ienainen docht: "Kom, ik mout ook mor weer ais op hoes aan." Mit jes aal haalf aan en knip ien haand vroug k ien jachtwaaide: 'Kin k even òfreken Freddie?" Dat kon aaltied! Vaaierntwinneg gulden en n kwartje, heurde ik hom nuchter zeggen. Ik langde hom n braifke van viefentwinneg tou en kreeg drij kwartjes weerom. Terwiel k muntjes onhandeg ien knip glieden lait, zee Freddie: "En bedankt veur de tip, Tjip." Doar haar k vot nait van weerom, mor dou k ien boeten n kolde poest wiend liek ien snoet kreeg, docht ik: ik krieg die wel weer voader.
Siekuur n week loader was twijde teneeloavend. Ik haar zulf ook weer mitdoan, omreden ze konden nou ja nait meer zunder mie. t Was lovve zeggen circa-plusminus-ongeveer-pak-hom-beet n uur of vaaier middenien naacht. Ik haar touzegd wat eerder thoes te weden as veureg moal, dus doar mekaaierde nait zoveul aan, von k zulf.
'Kin k even òfreken Freddie?" Dat kon aaltied! Twijendareg gulden en zesteg sint, rekende Freddie oet. Ik viste drij tientjes, n rieksdoalder en n dubbeltje te knip oet en legde t netjes noastmekoar op tapkaast. Dou Freddie ien ain oogopslag zaag dat t persies klopte, zee ik: "Loat zo mor zitten Freddie hur." Waren wie weer liek.

Leerms, 1992

Plaats reactie


Beveiligingscode
Vernieuwen