- Details
- Published on Sunday, 04 October 2009 12:00
Lubbe van Leerms
Ien 1928 is t volksverhoal 'Lubbe van Leerms' schreven deur Kneles ter Loan (dij van ons Grunneger woordenbouk). Doarnoa is der n tenailstuk van moakt en sunt 1957 is 'Lubbe' aal verschaaiden moal hier ien Leerms opvoerd, dit joar is t weer zo wied.
Kiender van Daiftilschoul magen op dunderdagoavend kommen om 'generoale' te zain.
Ien tachteger joaren heb ik veur t eerst ien 'Lubbe' mitdoan as veurzegger, ien 2000 was ik boas van t spul, dizze raais speul ik Lubbe zulf. Der is ook n koor bie, woar Liesbeth ien mitzingt.
Ben Grolle hier oet dörp het n haile bult foto's moakt van ons 'Lub'. Machteg mooi. Op www.leermens.net is ales te zain ( Picasa-web).
Mit tenail is t aaltied weer ofwachten hou t gait, t is gain film dij aal t zulfde blift. Doarom is t veur speulders en lu ien zoal elke moal weer spannend. Zodderdag verlaip nog beder as vrijdag. Leste oavend allerdeegs n stoande ovoatie, ofschoon ikzulf wel n moal goud ien knuur zat: mien geheugen dee t eefkes nait meer, mor k bleef ien mien rol en k heb mie der oetred.
'Lubbe' is n meroakel schier stuk. t Is hier vanòf 1957 aal verschaaiden moal speuld, mor zoal ging weer haildaal mit. Ik denk dat dat komt deur t maffe themoa, de structuur en de 5 rollen. Diskeer haar Harry Aalberts regie en dij het ook veur n grode veraandern zörgd. Tot nou tou wer Lubbe aaltied speuld as ain dij onder plak zat van zien kwoaje vraauw Lenoa, mor Harry het ter n man van moakt woar men groots op weden kin. Lub is nait meer maanje minst en k heb mit veul plezaaier ons Lub speuld, ain van mien mooiste rollen tot nou tou!
Binnenkort op DVD.