'Kiek, hier stait t', zeg ik groots. Liesbeth kikt bie mie over scholder as k noar t interview wies dij man van t Nijsblad veurege dag over mie moakt het.
Maaike kropt bie mie op knij en kikt ook mit. 'Ik doe mijn werk heel serieus' stait ter boven. As ik t verhoal verschaaiden moal lezen heb, krigt Liesbeth kraant om t aander nijs ook even te lezen. 'Hé, mos ais heuren', zegt ze ienainen, 'ankom week is der wat te doun ien Hoogkerk. Ze hemmen op n soort aailand n Middelaiws dörp noabaauwd en doar is vanales te doun: eenmaal op het eiland zelf, komt U via de grote stadspoort op het marktplein, waar verschillende artiesten voor U optreden. Zel we doar hin?' Maaike stait votdoalek veur mie: 'Ja, dat gaan we doen hè, pap?'
'Wat is dat veur n bordje doar?' Twiel ze dat zegt, wist Liesbeth noar kaant van weg. As ik bie heur aarm laangskiek, zai ik t ook ien baarm stoan. n Bordje mit n piel. As k langsoamer rieden goa, kin k lezen wat ter op stait. 'Watergang', zeg ik haardop. 'Heet het zo?' vragt Maaike achter ons. 'Joa, zo hait t', antwoord ik.
We volgen nog n stuk of wat van zukke bordjes en kommen net boeten Hoogkerk bie n stuk gruinlaand oet, woar aal verschaaiden auto's op rieg stoan. n Parkeerwachter wist ons stee veur auto, vervolgens dirigeert hai ons noar overkaant weg woar n man of viefteg bie n bushalte stait. Nait veul loader komt bus der aan, n old-timer zunder dak. Ik kin t nait loaten en vroag aan Maaike of ik bie t roamke zitten mag. t Ritje is nait zo laang, want n poar kilometer wiederop mout we overstappen op n groot vlöt mit n tribune der op. Deur n braide gracht voaren we langsoam om n aailand tou en aalweg zain we tafferelen oet vrouger tied. 'Kijk mam, een kanonskogel', ropt Maaike. Mit n grode boog vlugt ter n leren baal deur lucht hin. n Wichtje veur ons kropt bie pabbe op knij as n koezendokter mit alerhande raif zien patienten aan nog meer pien helpt. n Endje wieder stait n rieg monniken. Ze geven nkander n woord deur, mor bie leste man is t n hail aander woord worden.
n Haalf uurke loader binve haile ien t ronde kommen en leggen we aan bie t aailand. Over n smaal zandpadje kommen we veur n grode poort, woar n echte poortwachter oet de Middelaiwen stait. As we bie hom laangs lopen, herken ik hom: Albert van Ham, regisseur en tenailspeulder. Om t beeld veur Maaike nait te versteuren, steek ik haand eefkes op, mor k zeg niks. Poortwachter denkt ter aans over. Hai beweegt nait, mor zegt haard: 'Moi Tjip.' Maaike kikt man mit grode ogen aan en zegt tegen mie: 'Hé pap, kenden ze jou in de Middeleeuwen ook al?'
Leerms, 1993.
Reactie plaatsen
Reacties