Ien 1928 is t volksverhoal 'Lubbe van Leerms' schreven deur Kneles ter Loan (dij van ons Grunneger woordenbouk). Doarnoa is der n tenailstuk van moakt en sunt 1957 is 'Lubbe' aal verschaaiden moal hier ien Leerms opvoerd.
Ien tachteger joaren heb ik veur t eerst ien 'Lubbe' mitdoan as veurzegger, ien 2000 was ik boas van t spul, dizze raais speul ik Lubbe zulf. Der is ook n koor bie, woar Liesbeth ien mitzingt.
Der binnen weer n haile rieg foto's moakt van ons 'Lub'. Machteg mooi. Op Leermens.net is ales te zain.
Mit tenail is t altied weer òfwachten hou of t gait, t is gain film dij aal t zulfde blift. Doarom is t veur speulders en lu ien zoal elke moal weer spannend. Zodderdag verlaip nog beder as vrijdag. Leste oavend allerdeegs n stoande ovoatie, ofschoon ikzulf wel n moal goud ien knuur zat: mien geheugen dee t eefkes nait meer, mor k bleef ien mien rol en k heb mie der oetred.
'Lubbe' is n meroakel schier stuk. t Is hier aal verschaaiden moal speuld, mor zoal ging weer haildaal mit. Ik denk dat dat komt deur t maffe themoa, de structuur en de 5 rollen. Diskeer haar Harry Aalberts regie en dij het ook veur n grode veraandern zörgd. Tot nou tou wer Lubbe aaltied speuld as ain dij onder plak zat van zien kwoaje vraauw Lenoa, mor Harry het ter n man van moakt woar men groots op weden kin. Lub is nait meer maanje minst en k heb mit veul plezaaier ons Lub speuld, ain van mien mooiste rollen tot nou tou! Binnenkort op DVD.
Ien 2017 hemmen we 'Lubbe' nog n moal ien boeten opvoerd, bovenop bult, veur n poar honderd man, mit allerlaifst weer. Op www.leermens.net is ain en aander te zain: klik op video (onder BEELD).
Leerms, oktober 2017
Reactie plaatsen
Reacties